2016年11月28日 星期一

經常著高踭鞋會對身體有甚麼影響?

CLEAN SKINCARE 小知識 – 經常著高踭鞋會對身體有甚麼影響?

小編曾經有一段時間都好鍾意著高踭鞋,覺得著左高踭鞋人高d,身形拉長d瘦d感覺好似自信d,以前除左返工時會著,行街又會著,重要場合更加會著啦,跟住著到雙腳同埋腰部開始痛同埋痺,要去睇醫生治療先至認真去正視呢個問題,所以而家減少左著住黎行路,盡量縮短著既時間,因為長時間著高踭鞋會傷及到腰背膝各部位,除此之外對身體既影響仲有:-
  1. 高踭鞋個踭同地面接觸面好細又唔穩陣,唔可以有效咁支撐和平衡身體,當我地每行一步時身體既肌肉要比正常用多D力去平衡,時間長左肌肉會過勞而引發痛症.
  2. 著高踭鞋行路時會令膝關節內側既壓力增加,壓力刺激下增加負荷,時間短可能引致膝蓋關節移位,附近軟組織勞損,扭傷足踝,長時間的話會導致退化性膝關節炎.
  3. 著高踭鞋時身體會自然地重心向前傾,身體為左要平衡會用全身既肌肉去向後靠,目的係將重心拉返中間,當身體越用力去平衡肌肉就越繃緊,咁樣身體各部份係好容易受傷,另外小腿肌肉都會因長時間收緊而導致抽筋或勞損.
  4. 著高踭鞋最常見既影響仲包括有腳趾及腳掌變形,盤骨向前傾,腰椎移位,腰椎弧度增加和肌肉受傷,如果鞋頭太尖仲可能會引致姆指向外翻,而鞋踭太高就會導致前腳掌長時間受壓而痛楚.
  5. 如每日著高踭鞋行5小時,而每星期又著多過6日,小腿前方既肌肉會比著平底鞋發達多2倍,漸漸小腿變得越來越粗壯.腳部血液循環好與壞要視乎腳踭活動既幅度和次數,著高踭鞋其實係用腳尖行路,腳踭既活動幅度自然減少,血液循環會變差而出現腳部浮腫水腫狀況.
其實為左身體健康著想,建議從而家開始和留意減少著高踭鞋既時間,如果唔能夠避免或因工作需要時穿著,咁就要考慮係返工放工時著返波鞋或平低鞋,有時間就做下腿部既伸展運動或拉筋,定時按摩下小腿,款色方面盡量揀選鞋踭面積較大和矮踭既款式,同埋用高踭鞋專用既鞋墊,以上都可以減低對身體各部份既影響哦.

免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢.