2018年6月28日 星期四

為什麼頭髮會變白?

CLEAN Blog - 為什麼頭髮會變白?

從以前就一直聽過好多有關白頭髮既傳聞,比如:唔可以拔,因為拔1條出3條/ 因為用太多腦,所以白頭髮會多/ 年紀大了/ 營養唔夠等等。。。所以好奇心重既我,當然即刻搜集資料並分享俾大家啦,請繼續睇落去啦。

首先解釋下我地頭髮由毛囊到頭髮既結構先:

  • 毛髮頭:主要係維持住毛髮身(即係頭髮)既營養同埋生長
  • 毛囊:主要利用囊中既微血管將營養灌輸到頭髮內,亦係頭髮既源頭
  • 髮根(毛乳頭):主要係吸收毛囊所供應既營養
  • 毛髮(頭髮):頭皮上既組織纖維,但冇血管或神經

至於髮色係視乎毛囊既色素粒子,而該粒子係由髮根(毛乳頭)周圍既黑色素細胞所產生,但由於每人既黑色素細胞都唔同,所以會有不同髮色之分。但除左天生既髮色會有唔同,以下幾點都會令髮色變白哦:

紫外線

  • 髮絲受到陽光既傷害係約皮膚既三倍,所以會令頭髮容易氧化而導致髮色變淺,除此更會損害髮質如失去彈性或光澤,所以係猛烈既陽光下,請記得要出門前備帶遮光傘或帶帽哦。

年紀增長
  • 因為新陳代謝隨著年紀而減慢,身體既黑色素合成細胞從30後就每10年減慢8%至20%,所以頭髮亦因為缺乏黑色素既情況下而變得灰白。

情緒影響
  • 因為精神緊張或壓力過大,咁會有機會令血管收窄而影響身體既血液循環,導致髮囊營養不足,令黑色素不能正常產生,所以令頭髮變成灰白。

飲食習慣

  • 如飲食習慣不良,會導致營養不足,當缺乏維他命B雜,銅,鐵等會導致髮囊未能成功合成黑色素粒子,之後令頭髮變成灰白。

其實隨著年紀而有白頭髮係一種正常既現象,但如果30歲前既白頭髮過多,咁就要多加注意或向醫生求診哦,而關於拔一條白髮會多出幾條呢個情況就未有相關資料有顯示,但如果用拔既方法,反而會傷害毛囊而有機會導致該位置不再生毛髮哦,另外持續既健康飲食同生活習慣,多做運動或多做有助減壓既活動都可以減慢生白頭髮既速度和數量呀。

免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢.


2018年6月23日 星期六

那些食物會有機會令皮膚變差?

CLEAN Blog - 那些食物會有機會令皮膚變差?

相信每個女士都會好勤力好用心咁去做療程護膚,都係因為想keep住『原』美既一面,但總會發覺有一段時間d皮膚唔知點解係會差d,就算生理期以外既期間都會變差,究竟點解咁勤力去做療程護膚都會咁呢?

其實要護好皮膚既膚質除左外在既護理外,我地既內在護理亦要加多注意,因為食物對我地既身體亦有好大影響哦,某d食物會令我地膚質變差,老化,生暗瘡,甚至色斑顏色變深等。


所以今次分享以下一d會令皮膚變差既日常食物,咁大家如果想keep住皮膚係『原』美既狀態就要避免經常進食啦:

高糖份既食物,如:糖果,甜品,零食等

  • 當攝取過多糖時而身體又未能分解到,咁就會產生一種叫糖化終產物既物質,簡單理解就係糖與蛋白質既合成品,經過一連串既反應後就會影響及破壞身體其他蛋白質既正常功能,包括皮膚既膠原蛋白,所以攝取過多既糖就會令皮膚失去膠原,亦即係失去支撐,導致老化跡象如:出現鬆弛、皺紋、毛孔粗大等情況

油炸食物

  • 一般炸物既油所含既飽和脂肪同反式脂肪較高,呢類既脂肪除左會令皮膚既油脂分泌失衡,容易滋生暗瘡外,仲會產生自由基,之後造成骨膠原和彈性纖維流失,令皮膚變得鬆弛脆弱,最後令皮膚加速衰老

烤肉

  • 烤肉會令皮膚中膠原蛋白流失,因為烤焦嘅燒肉含有多環碳氫化合物,容易引起皮膚發炎,導致膠原蛋白質被為分解,令皮膚造成出現衰老和欠缺彈性等問題.另外過多既肉類會令酸性同毒素引起大量既自由基,當人體進食後會破壞體內既好細胞,令新陳代謝減慢,導致皮膚急速衰老

乳製品

  • 芝士或者牛奶製品中含有牛奶內既荷爾蒙、激素、甲種乳白蛋白、乙種乳球蛋白同埋酪蛋白等成份,而呢類既成份對每個人既反應都會有唔同,比如荷爾蒙分泌失調導致油脂分泌過多而生暗瘡,暗粒等,或所含既激素和乳白蛋白令發炎指數提升,從而引起皮膚炎如濕疹、痕癢、紅腫和敏感等等。

如果想了解多d如何能改善皮膚或做一次免費皮膚分析,歡迎用以下方式聯絡我們同事,另外我地中心亦為第一次光臨既顧客提供一次半價既激光療程試做哦,可在旁邊既連結了解更多和登記哦:http://www.cleanskincare.com.hk/zh/trial.html


免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢.

2018年6月21日 星期四

女士們適合做負重運動嗎?

CLEAN Blog -女士們適合做負重運動嗎?

夏天既日子係我地女仔修身既重要日子,因為想著衫著得好睇d,線條好d,去海灘都唔洗左遮右遮啦,但唔想凈係跑步,想做d負重運動,但又驚會做到d線條粗晒,咁點算啊?

其實要了解當身體既肌肉比例多既時候,熱量燃燒亦會較快,之前一篇『女子適合做健身嗎?』分享過女仔要結實緊緻既線條就要做重量訓練,因為有氧運動主要消耗脂肪,而重量訓練就可以增加肌肉令身型線條增加。但因為雄性激素既原因,女性即使想練肌肉,難度會比男性大好多.所以一般女性進行力量訓練並不會大幅地令肌肉長大,反而只會提高肌肉品質,增強身型線條感。

但要注意當做負重運動黎改善線條時,咁要控制以下事情:

  • 每組運動既時間:一般做負重運動係10~12下乘3組,但好多人都會係1分鐘唔洗就做完一組,但咁樣做效果會降低,因為研究顯示如果要訓練有效果,咁要係每組既訓練要令肌肉繃緊45至60秒,即係每下要維持約4至5秒才會有效果,咁意思就係慢上(或推)慢落(或收)
  • 選擇合適既重量:好多時會有誤解越重越有效果,如果係想增加肌肉量既話就正確,但如果係想改善線條咁就應該注意姿勢同動作,因為如果太重既時候會導致做唔晒3 x 12或每下只上(或推)到一半就落(或收),咁其實係唔會有效果的。

最後要記得控制食量同食物,因為無論妳幾努力訓練都好,但如果飲食習慣唔好都會前功盡廢喔,又或者只控制食量減肥都係唔建議既,因為要燃燒脂肪同收緊肌肉就只有做運動才能達成噢,所以大家都一齊黎享受做運動既樂趣啦!

免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢。

2018年6月17日 星期日

濕疹後點解會留下黑色印?

CLEAN Blog - 濕疹後點解會留下黑色印?

較早前分享到一篇關於有濕疹應避免進食那些食物後,有頗多讀者來訊息問濕疹後點解會留下黑色印?所以今篇就不如寫出黎分享比大家啦。

首先簡單去理解『濕疹』就係因為皮膚免疫系統出現錯亂而攻擊自己身體,亦都可能係因為遇到某種致敏原(塵埃,細菌)或皮膚過乾而產生的,所以濕疹就等於炎症既一種。

當皮膚有炎症時,我地既皮膚機制就會產生某種會令黑色素活躍既物質如(prostanoid),細胞激素(Cytokine)等發炎性物質,所以一般發炎後既部位都會黑色左,比如暗瘡,傷口癒合後,被蚊子叮後等。

而呢d色素就稱為發炎後色素沉澱啦,雖然某部份既印會好快就冇左,但如果係發炎部位係癒合期受紫外線照射,發炎階段太長(如傷口太深),代謝率較慢或同一位置經常發炎既話,咁該色素會好難退去。

如果要處理,可以參考以下辦法:

  • 首先要避免令患處變得更深色,所以出門或有紫外線(如太陽,射燈等)照射下就要搽物理性防曬產品係發炎後色素沉澱位置上,咁可預防色素增加再沉澱,令該部位更黑更難分解。
  • 建議可以搽維他命C,E產品針對局部皮膚。
  • 如果想快速有效,可進行激光治療去除發炎後色素沉澱,原理係利用激光既能量激碎皮膚底層既沉澱色素,之後讓身體既巨嚼細胞吞噬後,再經代謝過程排出體外。

如果您有更多關於發炎後色素沉澱既疑問,歡迎用以下方式聯絡我們預約做一次免費既專業皮膚分析哦,另外我地中心亦為第一次光臨既顧客提供一次半價既激光去除發炎後色素沉澱療程試做,可在旁邊既連結了解更多和登記哦(請選擇暗瘡印激光療程):http://www.cleanskincare.com.hk/zh/laser-a.html

免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢。

乜係訓黎頸?

CLEAN Blog - 乜係訓黎頸?

睡眠對身體既重要性相信大家都已經知道,而相信大家亦都試過訓黎頸,一起身條頸就梗左,兩邊(或單邊)痛楚無比,雖然過一兩日會慢慢好返,但其實有冇得避免呢?又有冇方法可以快d好返呢?今篇就分享下啦:

訓黎頸既學名叫『急性頸椎關節周圍炎』,意思係肌肉處於繃緊狀態,所以肌肉出現急性痙攣既現象(俗稱抽筋),原因一般有以下兩種:

  • 停留係同一角度太耐:比如天氣寒冷,所以一般人都會將膊頭縮起,但一直縮起既話咁肩至頸既肌肉就會一直處於繃緊狀態,同樣地玩電話,睇書,睡眠姿勢等都會發生同樣問題,以上導致血液循環減慢而出現痙攣狀況發生。
  • 『保護性肌肉痙攣』:屬於身體一種自我保護機制,當身體偵測到任何部位出現『錯位』問題,就會啟動呢種機制黎限制患處出現不適當活動而加劇傷患,所以當頸部進行太劇烈或太大活動幅度既時候就會發生『保護性肌肉痙攣』,即係俗稱既『choke(擢)到』啦。

所以簡單去理解訓黎頸其實就係肌肉抽筋或發炎既一種,咁有冇一招就可以令痛楚消失?答案係冇既,除非食止痛藥,但就有d動作可以減輕同縮短痛楚:

  • 適當地伸展患處:令繃緊既肌肉放鬆及改善血液循環,令患處慢慢回復正常狀態,但要注意一感到有痛楚就要停,唔好急住要『拉返鬆』就搏命係咁拉哦。
  • 適當地按摩患處:作用同以上一樣,但建議唔好用震動既儀器按摩,因為每人對呢類儀器既反應都唔同,所以最好係用手部慢慢按摩
  • 熱敷:有助血液循環,放鬆肌肉

最後,如要預防就平時要注意多做伸展活動,購買一至兩個適合自己睡姿既枕頭(因為有唔同既外在因素會影響睡姿),注意姿勢唔好經常低頭或停留一個位置太耐,咁就可以預防『急性頸椎關節周圍炎』發生啦。

免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢。

2018年6月14日 星期四

濕疹應避免那些食物

CLEAN Blog - 濕疹應避免那些食物

最近天氣又熱又焗,一出門就成身大汗,有濕疹既朋友更叫苦連天,因為d汗液會刺激皮膚,而且加上潮濕天氣就更加容易令細菌滋生,所以如果係大汗既朋友就建議多帶一套衫和內衣褲替換,減少皮膚和吸收了汗液的衣服長時間接觸,從而減少對皮膚既刺激性。

但除左外在因素,其實內在因素亦都好重要,因為濕疹係自身既免疫系統出現問題,所以才導致由內至外咁發出濕疹症狀,所以飲食亦會直接影響同刺激到我地既身體系統哦,以下分享幾種較常見濕疹患者應避免既食物:

  • 蛋類:最常見既致敏原,因為經研究顯示雞蛋裡令皮膚敏感既物質有類卵黏蛋白(ovomucoid),卵白蛋白(ovalbumin),卵運鐵蛋白(ovotransferrin 或conalbumin) 及溶菌酶(lysozyme),以上幾種都會引起不同種類既皮膚敏感(因人而異),所以可避免進食雞蛋或含蛋類較重既食物如蛋糕,班戟,麵包等等。。。
  • 牛奶:另一種常見既致敏原,經研究顯示牛奶裡含有數種會令皮膚過敏既蛋白質如酪蛋白(casein),α乳蛋白素(alpha-lactalbumin) 及β乳球蛋白抗體(beta-lactoglobulin)等等。。。建議改飲植物奶如豆奶,燕麥奶或杏仁奶和可避免進食含牛奶較重既食物如芝士,雪糕,朱古力,麵包等。。。
  • 麩質食物:麩質其實係麥類既蛋白質,冇論小麥,大麥,黑麥,麥皮等都含有麩質,而某部份人會以為麥包係冇麩質,其實唔係,但因麩質而產生濕疹係因為經常進食含有麩質既食物如麵包,餅乾,麵條等就會有機會造成皮膚敏感或濕疹。

其實仲有其他食物都會有機會引起濕疹,如海鮮,肉類等都會令皮膚產生敏感,但以上三種較為普遍而日常會經常食到既食物,所以可以先從減少進食以上三種食物,之後再慢慢觀察有冇改善,如冇既話就要再留意及減少平時會進食得多或好耐冇食過但而家食返既致敏食物,當然,如果情況持續或惡化就要盡快求診哦。

最後,以下分享兩篇關於濕疹既文章比大家作為參考:


免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢。

2018年6月11日 星期一

每日飲6至8杯水會令皮膚更好嗎?

CLEAN Blog - 每日飲6至8杯水會令皮膚更好嗎?

當我地皮膚出現缺水情況時,皮膚有可能會出現嘅反應係泛紅、痕癢、甩皮、敏感等問題。。。所以好多時我地都會去維持和補給皮膚水份,但有讀者問到如果每日飲6至8杯水可以令皮膚變得更好嗎?會將面上或皮膚既色素減淡嗎?會有補濕既功效嗎等等。。。

首先我地人體中佔有約90%都係水份,而皮膚既最底層(基底層)含水量高達70%,而角質層約20%-35%左右。而係正常情況下,皮膚最外層嘅角質層含有多種天然保濕因子去幫助皮膚鎖住水份,之後皮脂腺會分泌出一層皮脂油份黎保護水份既流失,但係冬天或隨著年紀既增長,皮膚既油脂分泌會減少,導致皮膚慢慢變得乾燥。

而一般飲水後會經過腸胃道吸收後,腎臟會幫我地身體過濾水份,之後將多餘既水份連同其他代謝物一齊從尿液排出體外.但水份一般會隨著血液去到身體唔同既部位,而至於皮膚就只會去到基底層,所以飲水係補唔到表皮層或角質層既水份。

而色素等問題係冇辦法從飲水方式解決,因為黑色素係屬於細胞既一種,存在係皮膚組織內,所以只能透過激光能量擊碎後再經身體內既巨噬細胞吞噬再代謝出體外喔。

雖然飲水係冇辦法直接為表層皮膚補水,亦未能減淡黑色素問題,但每日保持飲6至8杯水係可令體內加快新陳代謝,排走體內代謝物,令身體有著健康既循環,咁有助皮膚更新,改善膚質,幫助被巨噬細胞吞噬後的黑色素排出體外等,所以多飲水對身體係百利而無一害哦。

如果大家想了解自己既皮膚狀況或想知道更多關於補濕或激光療程細節既話,歡迎用以下方式聯絡我們預約做一次免費既專業皮膚分析哦,另外我地中心亦為第一次光臨既顧客提供一次半價既療程試做,可在旁邊既連結了解更多和登記哦:http://www.cleanskincare.com.hk/zh/trial.html


免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢。

2018年6月8日 星期五

想皮膚好點解要吸取維他命A,C,E 同Omega 3


CLEAN Blog - 想皮膚好點解要吸取維他命A,C,E 同Omega 3

大部份既都市人都會壓力大,睡眠不足,飲食唔定時,飲食唔均衡等。。。所以為左保持身體既健康,大家都會每日食唔同既保健產品,但身體器官要保健,其實我地既皮膚都需要保健哦。

所以今次就分享幾種保健產品成份係對皮膚會有好處的:

維他命A

  • 好處:阻止角質分化,避免皮角質層過厚,減少毛孔閉塞既機會從而減少暗瘡滋生。
  • 那裡攝取:南瓜、木瓜、椰菜、波菜、馬鈴薯、肉類、鰻魚、紅蘿蔔、芫荽和芒果等。。
維他命C

  • 好處:幫助製造膠原蛋白,對抗自由基,延緩衰老,降低黑色素形成。
  • 那裡攝取:卡姆果(或卡姆果的保健產品)、檸檬、士多啤利、椰菜花和青椒等。。
維他命E

  • 好處:抗氧化,減低紫外線對皮膚既傷害,從而減少黑色素增加,製造皮脂保持皮膚有一定既滋潤度。
  • 那裡攝取:堅果(如杏仁,核桃,花生等)、芝麻油和蛋黃等。。
Omega 3

  • 好處:減少炎症和提昇抵抗力,令皮膚減少出現敏感問題(如產品過敏,濕疹等),幫助皮膚鎖水和吸水等。。
  • 那裡攝取:牛油果、奇亞籽、亞麻籽、三文魚、黑鱈魚、橄欖油等。。

其實天然既植物類食物已經供應我地所需要既營養,所以可以減少進食肉類都可以補充所需營養哦。如果妳想了解自己既皮膚狀況,歡迎用以下方式聯絡我們預約做一次免費既專業皮膚分析哦,另外我地中心亦為第一次光臨既顧客提供一次半價至七折既護膚療程試做,比如激光去斑療程,激光嫩膚療程,凹凸洞射頻治療等等,可在旁邊既連結了解更多和登記哦:http://www.cleanskincare.com.hk/zh/laser-a.html

免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢。

激光打得快,慢,長,短會影響效果嗎?

CLEAN Blog - 激光打得快短會影響效果嗎?

其實每款激光儀器都有特定既速度,波長和能量,而一般我地既激光治療師對第一次光臨既顧客會使用標準和安全既程序進行療程。但如果顧客既皮膚狀態在不穩既時候(比如:有敏感、乾燥、泛紅、發炎等),咁就會因應皮膚既狀況而調節激光既能量同療程範圍來確保顧客皮膚既安全。

但有時點解覺得做激光打得好快咁?會唔會打得唔夠架?

其實要視乎係進行緊邊一款激光療程和用邊一款激光儀器,例如係做深層斑激光或膠原再生激光時,咁個感覺可能會覺得快d,因為做既時候激光要係治療部位快速走動,原因係激光既能量唔可以係同一個範圍停留得太耐,咁係會令皮膚過度吸收能量而受熱受傷。另外如果係做淺層斑激光療程(如雀斑),咁就會因應色斑既分佈和大小,之後才決定每次要打既範圍,有時皮膚既色斑如果係好密和較多時,會因為安全起見(如避免皮膚發炎、過紅、過敏、過熱等情況發生),我地會適合地分開進行療程。

咁如果想快d見到效果,即係咪再係同一部位打多d能量或打多幾下就會快d見效?

其實唔可以架,因為皮膚唔可以承受過多既激光能量,如果過多就會令皮膚受傷甚至會出現反黑而令膚色變暗或色斑會更嚴重添,所以做既時候只需要選用安全和適當既能量做到效果,而激光師會因應客人當時既皮膚狀態,皮膚問題和療程類別而決定次數,所以唔係打多d就越好哦。

如想知更多關於激光療程既事項,可參考以下連結:

  • 激光去深層斑Q&A:連結
  • 激光去淺層斑Q&A:連結
  • 做完激光療程後,有什麼護理和注意可以達到理想既效果呢?:連結

如果大家想了解自己既皮膚狀況或想知道更多關於激光療程細節既話,歡迎用以下方式聯絡我們預約做一次免費既專業皮膚分析哦,另外我地中心亦為第一次光臨既顧客提供一次半價既療程試做激光去斑治療,可在旁邊既連結了解更多和登記哦:http://www.cleanskincare.com.hk/zh/laser-a.html


免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢。

2018年5月28日 星期一

海洋淨化新發展

CLEAN 環保 - 海洋淨化新發展

之前係2015年既時候分享左一篇『不要小看一個人的力量 - 連結請按此』既環保呼籲文章,話說當時有位19歲既學生Boyan Slat正在拯救地球和保護海洋生態.而片中係講佢同自己既團隊一起為浩瀚既海洋清走數以萬噸計既垃圾(據2015年統計大平洋環流裏就有大約725萬噸既垃圾,重量等於1千座法國艾菲爾鐵塔),而呢個數字相當驚人,但由於需要非常龐大既資金,所以一直未能實現。

當然,係呢段時間佢冇放棄過,甚至設立左一個基金會並不斷籌款,直到今年既3月份,佢地既同事因為見到我地之前有分享過呢個計畫,所以就聯絡左我地並令我地知道原來今年已經可以開始第一次試航!如果今次既測試成功,相信會有更多既投資黎繼續將呢個計畫發陽光大。

其實海洋既污染越來越嚴重,現在大概估計有5.25萬億件塑膠垃圾,而呢個數字亦係佢地想回收既數字,雖然而家開始有點眉目,但還在努力中,而且海洋垃圾遠遠超過呢個數字,因為仲有其他沉底既垃圾如玻璃,廢鐵,化學物等等,所以希望大家都能伸出援手,比如:
  • 去海灘時減少使用即棄用具如膠刀,膠叉,膠袋等。
  • 從海灘走時請記得帶走所有垃圾並將能回收的垃圾放去回收箱。
  • 家中減少使用含膠粒,化學成份等的產品
  • 減少浪費水源。
  • 將環保訊息分享俾身邊既人等等。
其實每一個人都可以幫到清理海洋,只要有呢個想法再付諸實行就得啦.雖然大海係屬於地球,但您我都有責維持同保護哦*^^*

如果有興趣知更多關於Boyan Slat基金會既資訊或如想支持佢地(捐款或捐出時間提供技能),可入旁邊既連結https://businessconnectworld.com/2018/02/21/the-ocean-cleanup-project/或電郵到connect@businessconnectworld.com

如想回顧之前Boyan Slat既影片可遊覽:How the oceans can clean themselves: Boyan Slat at TEDxDelft (中文字幕請按右下角的第二個ICON) https://www.youtube.com/watch?v=ROW9F-c0kIQ

2018年5月26日 星期六

皮膚起水泡,要篤穿佢嗎?


CLEAN Blog - 皮膚起水泡,要篤穿佢嗎?

有時我地女士們著新鞋行咗一日後就有機會係腳掙位起左水泡,有人會篤穿佢或者包紗布,黐膠布等等。。。但其實點樣處理會好d而避免患處受感染,另外水泡其實係點形成既呢?大家一般會點處理呀?今次分享既以下文章應該可以令大家有更進一步既了解

水泡較常見係由於摩擦,曬傷或者燙傷下而形成:

  • 經過摩擦既情況下,皮膚既表層同底層組織會出現脫離現象,呢個時候皮膚組織內既體液就會逐漸累積從而形成水泡。而由於手腳經常會同鞋或其他物品接觸摩擦,所以係人體最容易產生水泡既部位。
  • 另外當曬傷或燙傷後,皮膚因為受熱,所以身體部分體液會立刻趕到受傷部位,原因係要為受傷既部位降溫,避免身體受到更嚴重既傷害,所以才會形成水泡。

水泡形成後既處理:

  • 如曬傷或者燙傷下而形成既水泡,應立即冷卻該部位,咁可避免因溫度過高而傷至深層皮膚,冷卻方法係沖或浸泡冷水,但注意水量不可太大,以免將表皮冲破,而時間約30分鐘,如受傷面積較大時,最好泡進浴缸中,如無法沖水或浸泡,則可用毛巾隔住皮膚冷敷,反則使用冰塊或溫度過低之物品直接貼在皮膚降溫,會有機會造成凍傷。
  • 如摩擦皮膚下而形成水泡,而水泡位置冇感到痛楚,冇破損同埋冇裂開既話,咁就可以不用處理,主要保持清潔和乾爽就可以,因為大部分水泡能夠自然癒合,但記住唔好篤穿佢,因為覆蓋著水泡既皮膚其實係層保護膜,能夠防止感染。幾日後身體會重新吸收水泡裡既液體,所以不用理會。
  • 如果水泡自己破了,變成開放性傷口,咁就讓液體流出,之後用消毒藥水好好清理呢個位置,然後用乾爽,無菌既繃帶或膠布包好,防止感染直到癒合。

其實水泡形成後最重要係避免患處感染以及感染面積範圍擴大,所以唔可以自行篤穿佢,雖然大部分既水泡會自我修復,但係如果患處受到感染,水泡部位發紅,發熱甚至出現濃狀既液體流出,或者水泡係同一個部位一再出現或者水泡既情況非常嚴重,建議應該盡快就醫哦。

免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢。

2018年5月21日 星期一

點解會有頭皮屑?

CLEAN Blog - 點解會有頭皮屑?

唔知大家有時搭車或者行街時會唔會見到隔離或者前面果位既膊頭有好多白色一點點既頭皮,或者又有時見到人地搲頭時會飛d頭皮出黎?果時通常都會望一望自己都會唔會有呢(--_--滴汗)

自己有冇發覺可能本身係冇頭皮問題,但唔知點解有時間中都會有頭皮屑?其實點解會有d人長期有頭皮屑脫落,而有d人又間唔中先會有?

頭皮其實係從頭部脫落既角質層,但點解除咗頭皮以外而身體其他既皮膚角質層脫落時冇D一點點白色既?原因係頭部既角質層代謝過快而引致代謝唔完全就脫落,所以就仲會有白色或淡黃色既角質。

而大部份既人都有個概念就係『有頭皮係因為洗得唔乾淨』,其實並非完全係咁,雖然頭部洗得唔乾淨係會有機會引起頭油過多而滋生頭瘡或引起異味,另外再惡化就變成脂漏性皮膚炎,導致產生頭皮脫落,但經常洗頭亦會引起有頭皮既問題哦。

因為上面講過有頭皮係因為代謝過快而引致,所以越洗得密就會令頭部皮膚代謝加速,最終就變成惡性循環,一直洗就一直有頭皮,仲有如果洗得太多,咁就會令滋潤頭皮既油脂亦會不斷被洗去,造成水油不平衡而不斷分泌油脂,令頭皮油脂過多,最後亦會構成脂漏性皮膚炎。而另一個情況就係洗頭水既成份引致,因為化學成份如起泡劑,香料,酒精等都會令皮膚變得更乾,所以產生有頭皮情況。甚至於會引起不同既頭皮問題如皮囊炎,乾癬等問題。

其實當發現有頭皮時就要先自我檢查頭皮健康狀況,如果無痕癢,紅腫或傷口,咁就好有可能係同洗頭水成份有關,所以建議選用不含化學成份既洗頭水,另外如果有早晚洗頭既習慣,咁就建議晚上用洗頭水而早上就只用清水洗,因為如果早晚都用洗頭水就會過度清潔,有機會連頭皮既保護層油脂膜被洗去令頭皮變得過乾哦。

但如果發現一直持續或有痕癢,紅腫或傷口,咁就要立即求診,因為好有可能係細菌滋生而令頭皮出現問題,所以有頭皮問題絕不可忽視,因為除左影響個人外觀同形象外,就連健康都會有機會影響到哦,大家都多d留意自己既頭皮健康啦*^^*

免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢。

2018年5月18日 星期五

太田母斑同胎記係一樣嗎?

CLEAN Blog - 太田母斑同胎記係一樣嗎?

上篇分享左一d關於胎記既資料,之後What’s app同 Facebook都收到訊息問有關太田母斑係咪胎記?咁激光療程可唔可以減淡或去掉太田母斑?

其實太田母斑係屬於胎記既一種,英文稱為nevus of ota,一般會係幼兒時出現,顏色開始較淡,範圍亦較細,但隨著年紀增長,顏色會開始變深而範圍亦會擴散,至於成因係先天性,確實原因暫時未一定斷,但推斷係胚胎發育過程時黑色素細胞異常移動並停留係真皮層而導致該色斑問題。

太田母斑出現位置一般係單則面頰至眼皮(或眼球),而特徵係紫藍色,大面積,平滑,不規則,雖然對健康則不構成威脅,但外觀則受頗大影響。

治療方面現在較為有效的是ND-Yag Q-switched Laser,亦即係Q開關激光,儀器的激光能量使用1064nm既波長將真皮層內既黑色素擊碎,再由我地體內既巨噬細胞吞噬並經新陳代謝慢慢排出體外.所以經過治療後,面上紫紫藍藍既色素會慢慢減退,並且唔會有結痂既情況,療程安全有效,但就記得療程後要做好保養黎避免『反黑』哦,有興趣可參考『做激光後會反黑嗎?皮膚會變薄嗎?

如果大家想了解自己既皮膚狀況或想知道自己的斑點是屬於那一類的話,歡迎用以下方式聯絡我們預約做一次免費既專業皮膚分析哦,另外我地中心亦為第一次光臨既顧客提供一次半價既療程試做激光去斑治療,可在旁邊既連結了解更多和登記哦:http://www.cleanskincare.com.hk/zh/laser-a.html

免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢。

2018年5月17日 星期四

點解會有胎記?

CLEAN Blog - 點解會有胎記?

胎記,係指在幼兒期就能係皮膚表面見到既印記,一般可以分為:

  • 血管型胎記:指血管擴張或增生而令皮膚呈現紅色印記,但有d係會凸面既比如海綿狀血管瘤,如果發現有增生就要立即求診哦。
  • 色素形胎記:主要係色素增生而產生紫黑色既印記,某些種類會自行消失,但另一些則唔會。

雖然暫時未能確定點解會出現胎記,但暫時推斷既原因係BB係媽媽肚內發育時不成熟又或者遺傳性。

胎記一般都唔會對健康構成威脅,只不過會構成外觀影響,從而有機會影響小孩成長時既人際關係,所以家人們要多d關注呢一點。

以下分享一些胎記分類:

血管型胎記

  • 血管瘤:嬰兒期唔太明顯,之後慢慢會有凸起同變大既狀況,要留意既係該瘤生長既部位,因為如果係鼻內或附近,咁有可能影響呼吸,如果係眼附近就影響視角,如果肛門就影響排便哦。
  • 海綿狀血管瘤:因靜脈血管增生而產生,形狀似凸起既老人斑,但就係紅色或藍色,如果發現小孩出現呢種瘤就建議盡快求診,因為長大後會有機會影響血管或心臟既運作。
  • 草莓色痣:同血管瘤相似,但就更鮮紅色,同埋唔會擴大,有機會會慢慢自行消失,但如果BB係色痣未完全消失前抓到並造成傷口,咁就有可能會留下疤痕。

色素形胎記

  • 蒙古斑:顏色係暗青色,9成既東方人都係出世時會有,但直到3歲左右就會消失
  • 表皮母斑:屬於皮膚增生既一種胎記,一開始平面,但隨著年紀增長會有機會變成凸面既斑種,但要留意有40%左右既人會變成良性腫瘤或基底細胞癌。如發現此情況就要到醫院求診哦
  • 貝克氏母斑:幼時會見到一達啡色印記,但隨著年紀增長就會長出毛髮,一般會係手臂或背上出現,而現時既治療方法為激光療程。

如果大家想了解更多自己既皮膚狀況或想進行激光療程,歡迎用以下方式聯絡我們預約做一次免費既專業皮膚分析哦,另外我地中心亦為第一次光臨既顧客提供一次半價既療程試做激光去斑治療,可在旁邊既連結了解更多和登記哦:http://www.cleanskincare.com.hk/zh/laser-a.html


免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢.

2018年5月7日 星期一

血橙的營養價值


CLEAN Blog - 血橙的營養價值

今次小編發現到一種較少地方買得到嘅水果叫『血橙』,外形同一般嘅橙分別不大,而味道同普通橙係有d似但就帶點鐵質味,不過外皮較為薄,但最特別既係裡面嘅果有著一點點深紅色既果肉,其實呢種血橙到底同普通嘅橙有咩營養價值分別呢? 

其實血橙(blood orange)係橙嘅變種,由最早出現在歐洲1850年開始,當時主要種植係西班牙,意大利同埋北美等嘅國家,後來再分佈到中國重慶長壽區.呢種血橙最特別之處,就係體積比起一般橙略為細小,表皮有小凹點位,而佢嘅深紅色果肉含有一種叫花色素苷(Anthocyanin/簡稱:花色苷)嘅色素,係由花青素同糖結合形成嘅化合物,屬於一種天然嘅抗氧化劑,通常在於花朵或者果實當中,較少在柑橘類果實中出現.

血橙擁有一種獨特香氣,含有豐富既維他命C,鈣,磷,鉀,B-胡蘿蔔素,檸檬酸,橙皮甙同埋醛,醇,烯等物質,可以幫助我地增強身體抵抗力之餘,亦幫助體內有害物質容易排出,而且橙皮亦叫黃果皮,含多量胡蘿蔔素,幫助腸胃更加健康(當打果汁時可切一小片和其他生果一齊打),另外血橙都對我地身體有以下幾點好處: 
  • 橙內側既薄皮含橙皮甙(Hesperidin),可保持血管既彈性和通透性,保護心血管健康.
  • 含維他命C外,更有維他命E和B胡蘿蔔素,加上花青素苷具有抗氧化,預防心血管疾病同抑制癌症等作用.
  • 花色苷有抗氧化,抗凝血,抗輻射,抗動脈粥樣硬化,更可以預防糖尿病等嘅功效.
其實唔單只血橙對我地身體健康有幫助,仲有好多唔同既生果蔬菜都有好多營養,所以最好就每日都食唔同既生果蔬菜,咁身體可以每日都吸收唔同既營養,令身體更強壯哦~

2018年5月4日 星期五

坐得多會令脂肪積聚在臀部?

CLEAN Blog - 坐得多會令脂肪積聚在臀部

對我地女士黎講肥胖簡直就係天敵!而且係夏天就更加不能接受自己肥胖既身形,因為想著牛仔短褲或者去游水時都尷尷尬尬咁,但其實點解d脂肪大部份會積聚係臀部既,而男士就係肚部(俗稱啤酒肚),好多人都話因為坐得多所以就會有,咁係咪坐少d就唔會積聚係果d部位?

其實坐得多梗係會令脂肪增加,但積聚係臀部和肚部既主要原因就唔關坐得多或少事,有專家提過呢個問題係關乎身體先天性既生理結構問題,即係多出黎既能量就會係身體內儲存起來而轉變成脂肪,咁身體好自然地將呢d脂肪直接送去倉庫(男士=肚子,女士=下腹和臀部)黎儲存啦。

但要注意既係男士既脂肪一般會係內臟脂肪為主,所以如果脂肪比例一直增加,咁身體會患上疾病既風險亦會相對增加,比如有:糖尿病,高血壓,高膽固醇,心臟病等問題。而且30歲後既新陳代謝速度會逐年減慢,而脂肪消耗方面亦會減低,所以要係食量方面調整黎減低脂肪比例喔。

反而女性因為雌性激素分泌既原因,所以脂肪會較為積聚係臀部或雙腿上,但係更年期過後,女性雌性激素分泌減少,所以脂肪會開始積聚係肚子,慢慢會同男性一樣撐大肚子喔,所以絕不能忽視。

總言之如果一直都唔做運動,食完飯後就一直坐係梳化上,仲要食埋d高脂或加工性食品,咁一定會令身體脂肪比例上升,影響體重同外觀之餘,身體既健康都同樣受到威脅喔,所以都係保持進行帶氧運動(如跑步,遊水,打拳等),控制飲食既量同質,咁就可以繼續穿著牛仔短褲或者去游水時唔洗尷尷尬尬啦。

免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢。

2018年5月3日 星期四

有口氣(口臭)既原因

CLEAN Blog - 有口氣(口臭)既原因

唔知大家有冇試過同身邊既親友或同事傾計但聞到對方有一股口氣,但又唔好意思講出嚟,變左傾計時就會避來避去,好尷尬。。。搞到自己會不時擔心會唔會都有口氣。所以為左避免發生呢種尷尬既情況,我會多注意同避免以下事情,咁就可以避免有口氣問題啦!

了解造成口臭既原因:

  1. 常吃重口味及刺激性食物如大蒜,洋蔥,咖喱,韭菜等等,以及飲酒,吸煙,都會造成口臭問題。
  2. 研究指出女性荷爾蒙週期除咗與生理期同肌膚有關,另外仲會減少黏膜和唾液腺分泌量,咁會導致口腔較乾,結果就造成口臭。因為唾液具有沖洗食物殘渣既作用,而且唾液當中還含有抗菌物質,能夠預防細菌既繁殖,所以當唾液分泌不足時,會令口腔內既自我清潔能力減弱,導致牙周病菌容易繁殖,從而導致口臭同牙周病惡化,另外仲有蛀牙既風險添。
  3. 患有鼻腔感染,鼻竇炎,鼻蓄膿,以及肺炎,肺膿瘍等等,異味都有機會透過口腔散發出來,形成口臭。
  4. 腸胃疾病如消化不良,慢性胃炎,胃潰瘍,胃食道逆流等等,食物腐敗既異味會從胃腸產生,經過食道往上至口腔,形成口臭。
  5. 便秘亦會令體內的宿便,毒素及有害物質未能及時排出下造成口臭。

就以上原因可以了解到口臭其實係反映出身體內部既問題,所以不可忽視喔,當然唔係所有口臭問題都等於身體出現問題,以下小貼士可用黎解決同預防口臭問題,但如果口臭一直持續,咁建議去檢查一下身體噢:

  • 刷牙,用牙線及清潔舌苔:晚間飯後要刷牙,清潔舌苔,最好搭配每日用一次牙線徹底清除藏在牙縫內既牙垢,有助減少牙齦炎既發生,減少口臭問題。
  • 用鹽水漱口:鹽具殺菌功能,鹽分會令細菌因細胞缺水而死亡,以溫鹽水漱口有助消炎,帶走口中黏液既細菌,可改善口臭。
  • 飲檸檬水和綠茶:飲清水可令口腔保持濕潤,而在水裏加入檸檬片,有助刺激唾液分泌,減少因鼻塞,口乾或口腔內殘餘既食物引起細菌滋生造成口臭。綠茶葉有消菌既作用,有助消滅口腔中形成口臭既細菌。
  • 多攝取新鮮既蔬菜水果:蔬果中含有大量既纖維和維他命有效防止便秘同牙齦流血,有效排除口腔中過多既黏膜分泌物及廢物。
  • 使用口氣清新劑:能及時去除口腔中食物代謝物引起既臭味,建議可先喝幾口清水,之後先再噴上口氣清新劑後,令口腔保持清新。

免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢。