護髮素既好與壞

CLEAN Blog - 護髮素既好與壞

最近天氣維持又凍又乾,令到d頭髮好乾開晒叉,d靜電又令到d頭髮鬆散晒,早幾日問我嘅髮型師有乜解救,佢話用護髮素,但我不嬲都冇用既原因係怕笠同埋驚會毛囊閉塞和生頭瘡,但經佢解釋完之後就覺得原來護髮素係咁用先得,所以今次我都分享俾大家當做參考,如果妳都有同樣情況既話,咁呢篇應該可以幫到妳。

其實要先從洗頭水了解起,如果我地要洗去頭髮頭皮上既油脂,咁就要用較高PH值(即偏鹼性)既洗頭水先可以洗得乾淨,但其實我地既頭髮頭皮要係一個低PH值(即偏酸性)既環境下先會健康,因為如果過度將頭油去除,咁皮脂膜會受破壞,導致頭皮容易發炎同過敏,另外頭皮同面部皮膚一樣,過乾時就會分泌更多油份黎保護頭皮,所以點解越洗得密,頭皮反而愈快變得油膩。另外,頭髮乾旱時靜電亦會較易產生,所以最好令頭皮頭髮保持係一個低PH值(即偏酸性)既環境下就可以解決以上問題啦。

但一般市面上既洗頭水都冇標榜PH值,咁點算?

其實市面上大部份既洗頭水因為要潔淨能力夠好,所以一般都係PH 7或以上(7屬於中性,往上就係偏鹼性),所以護髮素就係一個解決既辦法啦。因為護髮素能夠中和PH值,而且有d產品係可以防靜電,因為用完後會係頭髮形成一層薄膜,咁有效防止靜電產生。另外護髮素有修復毛鱗片既功效,令頭髮變得順滑有光澤。(毛鱗片其實就好似皮膚角質層咁,如果角質層過乾,咁就會有乾紋或者甩皮,冇光澤等等。而毛鱗片過乾就同樣會冇光澤,斷裂甩髮,開叉等。)

咁點樣用護髮素先唔會笠同令毛囊閉塞?

護髮素應該只搽係頭髮既髮尾上而避免搽到頭皮上,而且記得要徹底沖洗乾淨,唔好留低係頭髮或背部身體上,以免護髮素既殘留成份阻塞毛孔,引致頭瘡暗瘡問題.另外『搽得越耐頭髮吸收越好』其實係一個誤解,因為護髮素對頭髮進行養分補給既時間係有限的,所以就算再耐d都唔會再被頭髮吸收,仲可能會有反效果添,所以通常停留3至5分鐘就夠了。

不過當中部份產品為咗令髮質用後有柔軟順滑既效果,但某d成份會導致皮膚受傷害哦,比如以下兩種成份要留意呀:
  • Propylene Glycol (丙二醇)- 可以令頭髮有順滑同濕潤既感覺,但有機會刺激皮膚引致皮膚過敏或出現炎症.
  • Sodium Lauryl / Laurent Sulfate(SLS)- 當成份進入毛囊便會有機會導致脫髮,而沖洗時不慎進入眼睛,亦有機會造成白內障問題,而且呢個成份會令皮膚保護層減弱,引致出現皮疹問題
睇完呢篇後大家對護髮素都可能會有所改觀,只要多留意成份,盡量揀含有較多或全天然成份既護髮素較佳,再配合以上既使用方法,咁就可以用得安心啦。 

免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人士諮詢

熱門文章