2018年3月30日 星期五

嘴唇乾既原因同影響

CLEAN Blog - 嘴唇乾既原因同影響

最近天氣開始回暖,但公共交通工具或辦公室內既氣溫就越黎越凍,因為d冷氣開得越黎越大,同時另濕度下降,令到皮膚都開始有乾既感覺。但除左皮膚外,嘴唇亦不知不覺地變得乾燥,特別係少飲水同習慣用口呼吸既人。

另外有鼻敏感既人會比一般人既嘴唇較乾,因為冇論係訓覺或者日頭都會有好多時候用嘴呼吸,因為鼻敏感令到呼吸系統閉塞,所以需要用口黎代替鼻黎呼吸。

但好多人都會有個習慣就係當嘴唇一乾既時候就會用脷去舐,但係咁做就只會越舐越乾,因為當嘴唇皮膚既保護膜不斷比舐去,咁嘴唇皮膚既水份就會不斷流失,導致越舐越乾既情況了。

而不斷舐仲會有機會滋生唇瘡(口角炎)添,因為口水係口角停留,積聚,最後滋生細菌,導致生唇瘡,所以當覺得嘴唇一乾既時候就提醒自己唔好用脷舐,之後要搽潤唇膏黎保持濕潤呀。

但除左因為以上問題而產生唇瘡,另外其實缺乏維他命B2都會出現口腔,口角或舌頭發炎,或者睡眠不足導致抵抗力下降都會導致生唇瘡哦。

所以大家應該:

  1. 從榖殼類或豆類吸取維他命B,雖然某些維他命B可從肉類或內臟吸取(如B2 / B3 / B5 / B12),但還是建議少食肉同內臟,減少身體負荷。
  2. 改善作息時間和飲食習慣,因為唇瘡同飲食營養有好大關係,所以多食有營養同天然既食物,減少煎炸零食。
  3. 戒掉舐嘴唇既習慣,隨身一支潤唇膏。

當能夠改善以上3點後,可降低滋生唇瘡既機會。如果想了解更多關於唇瘡,可按入旁邊連結哦:點解生唇瘡既,同一般暗瘡有冇分別?

免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢.

2018年3月29日 星期四

人心果既好處

CLEAN Blog - 人心果既好處

今編想同大家分享一種水果,其實在較早前已經聽聞過呢個名稱,起初只認為係其中一種藥材名,因為以為個寫法係『人參果』,但後來才得知原來係人心果,而且係一種水果嘅名稱,所以就買左黎試下同埋發現營養價值都高,所以想同大家分享呢種好食又有益既水果。

人心果又稱為:無鳳柿,鐵線子等,因為切開後似人心,所以命名為人心果,係一種熱帶水果類,原產於在中美洲,而家市面上買到既係來自於泰國,越南或台灣.從植物分類學講,係屬於山欖科嘅植物,初次見到人參果時,外皮皺皺地同啡色,裡面棕棕黃黃地色,有d似金奇異果咁。但味道就好甜同埋有一種獨特既果香味,本人就覺得超好食,但試過一次未完全熟透就食,嘩!個味道好澀好『嚡』,無可能食得落口,而且未熟透既人心果有可能對某部份人產生過敏,所以食之前要確保熟透同果身要『淋淋地』先好食喔。

但市面上有D果皮略帶金黃色,更有紫色條紋就好似一種瓜類,但其實呢d係來自中國內地(原產都係來自美州),又名香瓜茄同埋寫法係人『參』果,果肉比泰國越南種脆身,但小編我就未試過啦。

人心果既好處:
  1. 屬於非常高纖維既一種生果
  2. 營養含有碘,鉬,鐵,磷,硫,硒等人體必須既微量元素,亦含有維他命A,B,C,E等
  3. 非常高既鈣質,對比番茄高出114倍之多
  4. 含有硒元素既蔬果類十分罕見,而硒可以抗氧化外,仲有調控甲狀腺既代謝功能同埋有抗癌既可能性。
但雖然有文章說導人心果既營養成份對糖尿病患者有幫助,但同時因為人心果既糖份(葡萄糖)含量頗高,所以建議適量進食為妙。 

責聲明:以上所載的資料只供參考用途,均不能作為替代執業西醫的建議。在採取任何行動之前,你必須與有適當資格的執業醫療人仕諮詢。

2018年3月24日 星期六

天竺葵(Geranium)精油既好處

CLEAN Blog - 天竺葵(Geranium)精油既好處

相信大家都知道天然既精油有好多好處,比如消毒,消暗瘡,驅蟲等等,,茶樹精油和薰衣草精油係大家較常用到既,而今次想分享另一款既精油係天竺葵(Geranium),唔知大家有冇聽過呢?

天竺葵既原產地係非洲南部,但而家世界各地都有培植,而呢種植物係屬於開花類別既植物。市面上有數百種既天竺葵,有好多都只屬觀賞用途,只有少數能夠提煉出精油,以下四種係較具有代表性的品種:

  1. 波旁天竺葵(Pelargonium asperum)
  2. 芳香天竺葵(Pelargonium graveolens)
  3. 玫瑰天竺葵(Pelargonium roseum)
  4. 蘋果天竺葵(Pelargonium odoratissimum)

但最具知名度都係第一款,波旁天竺葵(Pelargonium asperum Typ Bourbon),因為其精油既親膚性高,意思係滲透力高,所以對皮膚既效果亦相對較為顯著。

咁天竺葵既好處同功效係乜?

  • 抗菌性能:經過研究顯示,天竺葵有抗菌能力,能有效抑制皮膚上既真菌,所以對癬類既皮膚病十分有效。
  • 傷口修復:當割傷後,係傷口上滴上混合基底油既天竺葵精油可幫助將傷口止血和快速修復,因為天竺葵能刺激皮膚表面既血液循環,令傷口修復加速。
  • 驅蟲:因為含有香茅醇和香葉醇,所以天竺葵有唔錯既驅蟲效果哦。
  • 止痛:研究發現天竺葵油可有效減輕疼痛,尤其是由糖尿病引起既神經疼痛。

仲有好多其他既功效比如對護膚,消化系統或消炎等都好有效哦。但係提提大家用既時候不可直接用精油搽上皮膚上避免灼傷,因為每款精油既濃度不一,要用
基底油稀釋後才可使用啊,如有任何不適或灼痛,請立刻沖洗,如沖洗後情況還未舒緩,請立即求醫。

免責聲明:以上所載的資料只供參考用途,均不能作為替代執業西醫的建議。在採取任何行動之前,你必須與有適當資格的執業醫療人仕諮詢。

2018年3月21日 星期三

泳池既水對皮膚會有影響嗎?

CLEAN Blog - 泳池既水對皮膚會有影響嗎?

游水應該係大部份人都會鐘意嘅一種運動,一方面可以幫助日常工作得到減壓,令心情放鬆一下,另一方面亦可享受在水中自由自在嘅感覺~

但好多時候都會聽話泳池水好污穢,d水有漂白水消毒水等,游完後皮膚可能會出現暗粒同埋過敏嘅情況,咁到底泳池既水對皮膚會唔會真係有影響呢?
 
其實泳池既水會加入一種叫『氯』既化學元素作為消毒嘅用途.氯係一種非常有效去破壞消除各種水中細菌和病毒既物質,亦係漂白水既主要成份之一

雖然呢種化學物質能夠將大部分既病菌,細菌同寄生蟲殺死,但係美國疾病控制與預防中心警告,其實唔係所有病菌,細菌同寄生蟲都能殺死,就比如隱胞子蟲(Cryptosporidium)卻有可能係帶有氯既游泳池裡繼續存活長達10日哦

而我地平時去到泳池時就會聞到一種刺鼻既氣味,好多人以為係氯嘅氣味,但其實正確黎講係當氯同其他物質結合時所發出既氣味,比如汗液同尿液

美國有實驗做過將『水加氯』和『水加氯再加尿液』放係兩個唔同既桶裡一斷時間,之後再打開黎聞,發覺『水加氯』係冇乜氣味既,但另一桶加左尿液既就有所謂既『泳池味了』,有興趣可睇旁邊既連結(實驗係第5分鐘開始,如需中文字幕,請在右下角設定)影片連結

而且帶有氯既水會對我地既皮膚同頭髮都做成傷害,因為氯會令水質變鹼性,咁會洗走皮膚上既油脂,加上其他既液體,咁會令皮膚變得乾旱同敏感,從而產生皮膚敏感,缺水,水油失衡導致出暗粒暗瘡等,亦有可能產生皮膚炎如濕疹,癬等皮膚問題

咁樣係咪最好唔好去游水先啱呢?其實都唔係既,但就建議揀一d較少人既公眾泳池或私人屋院泳池較好,同埋要注意一下游完水後嘅皮膚清潔,比如:
  1. 要刷牙漱口後進食:因為泳池水經常會進入口腔,以免有病菌進入胃腸道.
  2. 認真清洗皮膚:病菌容易殘留在皮膚上,用溫水同清潔產品淋浴,洗頭,令化學物品或鹽份洗掉,以防皮膚過敏問題出現.
  3. 清洗皮膚後最好塗上保濕同潤膚產品,保護皮膚滋潤度.
  4. 頭髮同樣重要:氯會直接損害髮質,導致枯黃,乾同開叉問題等,所以要仔細洗頭後,再加用護髮素. 
免責聲明:以上所載的資料只供參考用途,均不能作為替代執業西醫的建議。在採取任何行動之前,你必須與有適當資格的執業醫療人仕諮詢。

2018年3月15日 星期四

點解好似越訓越攰咁?

 CLEAN Blog - 點解好似越訓越攰咁?

有時會聽到朋友或同事講:訓極都好似唔夠咁,放假既時候個人仲好似越訓越攰添。

其實一般人都可能知道如果訓覺前玩一d較刺激既遊戲或睇一d緊張驚嚇既電影都會令大腦處於緊張狀態,從而影響睡眠質素。另外訓覺前食得太飽或飲酒都會影響睡眠質素哦,因為我地既消化系統要工作,本來大腦要休息但消化系統被迫要工作,導致身體系統錯亂,從而影響睡眠質素。

但除咗而上原因外,美國睡眠研究員兼神經學家,以及有關睡眠和運動既權威博士指出越訓越攰同睡眠呼吸中止症(又稱睡眠窒息症)有關,因為呢個症狀會迫使大腦係晚上做出艱難既決定,就係『要訓覺定呼吸』,因為當你訓覺時會因咽喉組織過多或呼吸道既肌肉鬆弛而發生反覆性既塌陷,堵住呼吸道造成呼吸變淺或困難,而嚴重者可能造成氣道阻塞而吸唔到空氣。所以當睡眠窒息症發生時就會破壞睡眠甚至乎做成腦部短暫缺氧,導致另一日會感到疲勞。

另外“磨牙症”亦都可能會造成以上越訓越攰既情況,因為磨牙症會令顎下頜關節紊亂,引起顎骨連接頭骨既肌肉和關節疼痛,影響睡眠質素。而且磨牙仲可能阻塞呼吸道,令身體唔能夠獲得足夠既氧氣導致同以上一樣既情況。

如果要改善以上問題可以選擇去牙醫診所做一個牙膠套黎改變口腔肌肉,從而改善睡眠窒息症狀(牙膠既作用和使用方法在此不作詳細解釋,請向牙科醫生查詢),而磨牙症亦有另一類既牙膠可以改善哦。

所以千萬唔好忽略睡眠質素,因為睡眠佔左我地人生大部份既時間,而要維持身體既健康就更加要有一個好既睡眠,如果唔係無論皮膚,身體機能甚至神經系統都會受創喔!

免責聲明:以上所載的資料只供參考用途,均不能作為替代執業西醫的建議。在採取任何行動之前,你必須與有適當資格的執業醫療人仕諮詢。

2018年3月13日 星期二

咩叫主婦手?

CLEAN Blog - 咩叫主婦手?

最近既天氣忽冷忽熱,搞到d皮膚都差左,有朋友d濕疹亦隨之而來,但某部份既人不嬲都冇濕疹問題,但突然係手部開始痕癢,甚至紅腫添,咁其實係咪濕疹黎架?定係呢d叫主婦手?咁主婦手同濕疹又有乜分別?

濕疹皮膚比一般膚質乾燥,而當天熱令身體排汗多左既時候,汗液停留係皮膚上太耐,就引起敏感反應.另外天氣太乾燥都會容易引起濕疹發作,因為濕疹皮膚偏乾燥,在沒有油脂層保護既情況下,導致水分流失,造成皮膚過敏或發炎既反應而引發濕疹發作!

而主婦手又稱為接觸性皮膚炎,引起既成因較多,比如:手部經常濕水,頻繁洗手,長期接觸肥皂,洗衣粉,清潔劑,消毒水或化學物品等等都會造成主婦手,因為以上既物質都會損害皮膚既保護膜,引致水分流失,皮膚會變得乾燥。由於皮膚失去保護,所以對外來刺激物既抵抗力會減弱,手部皮膚會變得敏感容易引發主婦手。

另外主婦手除左係一般家庭主婦外,某D職業如廚師,美容師,髮型師,護士,清潔工人等因工作關係,雙手需要經常濕水或接觸化學物質,所以患上主婦手既機會亦相對較高。

主婦手分為兩大類

  1. 刺激性皮膚炎:經常接觸刺激性物質,使皮膚受到刺激,通常即時或在短時間內發作。
  2. 敏感性皮膚炎:由於免疫系統受到致敏源刺激,不會即時發作,但當免疫系統對致敏源敏感化之後,皮膚便會發炎。

常見既主婦手特徵

  • 皮膚極度乾燥
  • 皮膚表面粗糙
  • 出現痕癢,刺痛
  • 甚致會有脫皮及龜裂
  • 長有小水泡

最後,以下分享小小既主婦手護理須知比大家啦,但如果病情嚴重時就要盡快求醫喔:

  1. 盡量減少以梘液洗手或用酒精搓手
  2. 洗手後即時塗上潤膚膏
  3. 避免用溫水或熱水洗手
  4. 如要接觸化學物時或洗腕時應戴上手套
  5. 切勿亂抓癢處,避免細菌感染

免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢.

2018年3月8日 星期四

腳部發出異味既原因?

CLEAN Blog - 腳部發出異味既原因?

大家都會同身邊既朋友或家人出街食飯,去朋友家到訪或者去其他公眾場所,有時都有機會遇到需要除鞋才能進入室內既情況,但心裡當時第一個反應可能會擔心經過整日嘅勞動腳部會唔會發出較重既氣味呢?又或者有時身邊既伴侶會提醒自己聞到一些氣味,其實腳部係冇任何病患既情況下點解會發出異味呢?

以前記得聽過『着鞋唔着襪』就會發出氣味,起初以為唔夠通爽嘅關係,但其實係鞋部裡面有細菌,由於汗水直接和鞋內接觸,所以會有機會產生細菌,從而產生異味。

但有著襪又點解都會產生異味呢?

原因係對襪可能洗完後因潮濕所以未乾透就收埋,或者放置多日係潮濕既環境中而滋生細菌,甚至乎洗既過程未清洗乾淨等都會滋生細菌,仲有鞋和襪既質地問題都會影響腳部發出異味。

基本上腳部只要經過一整日嘅汗水停留係潮濕同埋溫暖嘅環境下,咁就會令黴菌或其他細菌迅速繁殖感染同有傳播機會,再經汗液中含乳酸同埋尿素混合,令異味嚴重加強。

但以上係針對短暫發生既情況,但如果長期都有呢個問題咁就好有可能已經變成『香港腳』了。

香港腳又叫做足癬,一樣受到真菌嘅感染,係關於表皮癬菌(Epidermophyton),小孢癬菌(Microsporum),毛癬菌屬(Trichophyton)等等嘅感染,令腳部變得又紅又腫同埋甩皮,而且會出現痕癢同嚴重嘅異味添。嚴重感染既話,仲會引起出現灰甲嘅問題噢。

所以為左避免發生以上問題,我地就要由個人衛生做起:

  • 選擇質地較好既鞋和棉質既襪
  • 注意著過嘅襪,每次都要更換,唔可以重複穿著,保持鞋裏清潔,就算唔會經常洗鞋,都要用清潔消毒酒精,作為殺菌作用。
  • 每日回家後,要首先用梘液清洗腳部
  • 蘇打粉有除臭作用,可每日換鞋之後,放入少量蘇打粉在鞋裏面除臭。
  • 如腳汗較多既人,請多帶備一至兩對襪黎替換,而回到家中要將當日著過既襪用醋或滴露消毒後才放入洗衣機清洗。

如果問題依然存在的話,就要搵皮膚科醫生哦。

免責聲明:以上所載的資料只供參考用途,均不能作為替代執業西醫的建議。在採取任何行動之前,你必須與有適當資格的執業醫療人仕諮詢。

2018年3月5日 星期一

正/負離子對身體既影響?


CLEAN Blog - 正/負離子對身體既影響?

較早前一篇『岩盤浴能透過皮脂線排出體內毒素?』分享過人體吸入負離子後,體內既血清素會隨著增加分泌,從而增強身體既耐力同埋能量,會有助舒緩壓力,降低憂鬱情緒,改善注意力等等。但乜叫負離子?係咪整頭髮既負離子?咁有負既話係咪都有正?如果有,咁個作用或影響又係乜呢?

今次要分享既負離子係同頭髮既負離子療程冇關係㗎,今次分享既正 / 負離子係涉及身體健康既。咁離子其實係乜?

簡單黎講離子係來自原子,而所有物質包括我地人體細胞都係由原子合成的,當原子受到磨擦或其他原因而產生電荷從而變成離子。

咁乜係正離子同負離子,而對我地身體有乜影響?

如果要深入研究同解釋正離子同負離子既分別同構造,咁會變成上物理學了,哈哈哈哈,所以簡單地去理解就係當離子既正電荷多過負電荷咁就係正離子,相反就係負離子。

正離子對身體既影響同來源:
  • 一般都市既電子器材都會釋放正離子,冇論小至電話,手提電腦,電熱水煲或大至冷氣機,微波爐,雪櫃等都會釋放正離子,所以我地冇論係屋企,辦公室還是街道上都會存在正離子。
  • 而當身體吸收過多正離子,咁會令身體失去平衡,產生自由基,從而影響身體健康如:精神緊張,失眠,內分泌紊亂,抵抗力下降,容易疲倦等症狀,而且正離子過多既人士會產生較多靜電喔。
負離子對身體既影響同來源:
  • 相反,負離子既來源係大自然,比如瀑布,樹林,海邊等環境都載帶住大量既負離子,所以當我地去到以上既地方時,身體就會覺得有一種好放鬆既感覺,就好似將身上既繃緊同疲倦都從深呼吸後一拼呼出黎咁,因為體內既正離子被負離子取代,令身體回覆平衡,減少自由基。
所以多接觸大自然就可以令身體內既離子得到平衡哦,如果未能經常去郊外,咁建議放d綠色植物係室內同比陽光照射室內,減少家中既電子器材,甚至去跑步場都可以吸收到負離子哦,因為一般跑步場周圍都有種植樹木,咁一來可以吸收負離子另一方面又可以做下運動,一舉兩得*^^*。

2018年3月3日 星期六

壓力大真係會爆多d瘡?

CLEAN Blog - 壓力大真係會爆多d瘡?

大家有無發現如果當因為功課,工作或家庭而壓力變大嗰排暗瘡就好似生多咗咁,除左塊面,下巴,有時連條頸都有生埋暗瘡,另外當心情有起伏都好似會影響生多d暗瘡咁,其實係咪真係有關連呢?同壓力荷爾蒙有關?

隨著繁忙既生活,工作過度疲累,長期處於緊張狀態,睡眠不足,壓力過大等各種內外壓力因素下除咗會影響心情外,其實真係仲會影響皮膚生多d暗瘡,原因係壓力會令腎上腺素分泌增加和雄性荷爾蒙上升,導致荷爾蒙失調,而荷爾蒙會影響油脂分泌量,當分泌過剩就會令油脂管道阻塞,所以容易引致油脂性發炎而長出暗瘡,另外女士經期前都會出現荷爾蒙紊亂情況喔。

怎樣避免或減少生壓力瘡?

  • 多攝取和補充足夠既維他命B和C:因為當身體面對壓力時會消耗大量既維他命B和C,然後當身體缺少維他命B和C時會感到焦慮,情緒低落及軟弱無力等情況.另外如腎上腺在製造壓力荷爾蒙時都會需要用到好多維他命C,所以可以多吃穀類,綠葉蔬菜水果去攝取維他命。
  • 飲食習慣:每當有厭力時情緒會改變味覺,會特別想食甜食或煎炸濃味類食物,而當中油膩既食物會誘發皮脂增生,使暗瘡滋生和惡化.所以要自我控制,避免進食或少食呢類甜食或煎炸濃味類食物,另外平常亦可以多攝取蔬果,蔬果中含豐富既抗氧化劑,可以減低體內既發炎情況,令皮質醇降低使情緒穩定。
  • 運動減壓:做運動可以有效地減壓係因為做運動時會分泌安多酚,而安多酚會使人感到快樂,同時排走體內毒素,不過建議運動後要即時潔面和沖身,避免汗水黏著毛孔引發生暗瘡哦。
  • 不能強硬擠暗瘡:由於壓力會造成油脂不正常地增生,無論暗瘡有膿,無膿都不能強硬擠壓,因為暗瘡菌會感染到暗瘡患處周邊既皮膚,令暗瘡範圍擴大,另外如果擠到有傷口既話就有機會引致發炎留疤。
  • 透過專業治療:可選擇做暗瘡果酸換膚治療或激光治療,有效地去除多餘既油脂污穢,去除增厚既角質,疏通毛孔,平衡油脂,消除細菌,加快暗瘡痊癒和去除暗瘡印。

如果您想知道自己既狀況適合做激光療程定果酸換膚?歡迎用以下聯絡方式預約一次免費既皮膚分析,了解自己既皮膚狀況,又或者可在旁邊既連結登記一次既半價試做激光療程體驗或果酸換膚療程體驗哦:http://www.cleanskincare.com.hk/zh/trial.html

  • Our website: www.cleanskincare.com.hk
  • Facebook: PM
  • Mail: info@cleanskincare.com.hk
  • Tel: 2628 3242
  • What's app: 9843 8821
  • We Chat: cleanskincare
  • Line: cleanskincare

免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢.